“პუბლიკას” და “ნეტგაზეთის” რედაქტორები იხსენებენ, რომ მედია ამ გამოწვევის წინაშე დგას 2023 წლიდან, როდესაც პარლამენტმა ახალი გადაწყვეტილებით, სხვა შეზღუდვებთან ერთად, მედიასაშუალებებს აკრედიტებული წარმომადგენლების რიცხვი შეუმცირა.“პუბლიკას” რედაქტორის, ლიკა ზაკაშვილის თქმით, ცვლილებები დაუსაბუთებელი და ბუნდოვანი იყო, რადგან პარლამენტს არ ჰქონდა კონკრეტული საბაბი იმისა, რომ შეეზღუდა აკრედიტებული ჟურნალისტების რაოდენობა პარლამენტში.,,როცა აკრედიტაციის თავიდან გავლის მომენტი დადგა, გავიგეთ, რომ გამოცემებს აკრედიტირებულთა რაოდენობა შეეზღუდა. აღარ შეგეძლო, მაგალითად, მთელ გუნდზე, ყველა ჟურნალისტზე მოგეთხოვა აკრედიტაცია, დაწესდა კვოტები და ახლა თითოეულ ონლაინ მედიას შეუძლია მხოლოდ 3 აკრედიტებული ჟურნალისტი ჰყავდეს. აი, მე, მეგალითად, არ ვარ აკრედიტებული და თუ მომინდება პარლამენტში შესვლა, უნდა მოვითხოვო საშვი“.აკრედიტაციის გაცემის წესების ცვლილების შემდგომ, პარლამენტმა მიიღო უცხო პირების შესვლის შესახებ ახალი წესი, რომლის მიხედვითაც, პარლამენტში უსაფრთხოების დონეები ცხადდება. სწორედ ამ წესით ისარგებლა პარლამენტის თავმჯდომარემ 2024 წლის აპრილში, ორგანოში ყვითელი ზონა გამოცხადდა და რის გამოც ონლაინ და ბეჭდურმა მედიებმა პარლამენტში მუშაობა ვერ შეძლეს.ჟურნალისტებს პარლამენტში საქმიანობას სხვა ახალი წესებიც უშლის. ერთ-ერთი რეგულაციის თანახმად, თუ რომელიმე მედიის წარმომადგენელი დეპუტატს დერეფანში ნებართვის გარეშე გაჰყვება, ეს შესაძლოა მისი აკრედიტაციის შეჩერების საფუძველი გახდეს. ცვლილების საფუძველზე, მუშაობა უკვე არაერთ ჟურნალისტს შეეზღუდა.